ليالي الهالوين المرعبة

قلت اكتب هالبوست بالعربي عشان اوصل شعوري عدل ..... كالعادة مع اجازة شيف ز قلنا نروح يونيفرسال حق ليالي الهالوين المرعبة و هو عبارة عن مهرجان سنوي يسوونه من تاريخ ٩/٢٢ ليما ١٠/٣١

 Silent hill and the walking deadو كل سنه في شخصيات من افلام الرعب اللي تكون من انتاج يونيفيرسال. هالسنة كان

من البوابة الرئيسية حسينا بالوضع ،المكان كله تغير ١٨٠ درجة و موسيقى افلام الرعب شغالة على طول صج تحسون انكم داخل فلم عند البوابات وايد شرطة و كان تفتيش الجناط و المخابي شغال ، عشان يتفادون المشاكل داخل و الناس ما تأذي الموظفين اللي يخرعون الزوار

هذا الأخ منخش بين الزرع و ينط على الاوادم اللي يمرون

و احنا قاعدين نمشي شفنا واحد حاط التراي بود ماله و قاعد يصور الشخصيات اللي قاعدة تمشي جان اصوره و اهو يصور :[

المكان كان فيه ٧ بيوت رعب راح احط فكرة بسيطة عن كل بيت

The Walking Dead
 

مقتبس عن المسلسل الشهير الذي يحمل نفس الاسم ، البيت عبارة عن رحلة تبدأ بمستشفى و تمر فيها داخل المدينة اللي الزومبيز منخشبن فيها بكل ربعه و يخرعونا فيها و احنا نتمشى .. للأس ممنوع التصوير داخل لان المكان اضاءته مو قوية و بالفلاش راح يبينون وين منخشين

 Goth

من اسم المكان يعني كله تماثيل ... البيت من داخل مشكل تماثيل و ناس لابسة تماثيل يعني و انت تمشي ما تدري اي تمثال بيمسكك و الا بيطب عليك .. حصلتلكم جم صورة من النت يمكن توصل الوضع عدل

Alice Cooper

انا ما كنت اعرف هالمعلومة و اكتشفتها و انا اكتب هالموضوع .. اليس كوبر في الحقيقة مغني روك حقيقي و خلال بحثي قريت ان اهو اول من ربط الرعب بموسيقى الهيفي ميتل .. لما شفت صورته عرفت ان ويهه مو غريب

هذي صورته ايام الشباب ... المهم البيت اللي يحمل اسمه عبارة عن رحلة داخل وحدة من الحفلات اللي قدمها .. فتسمع الموسيقى العالية و تتمشى بين الحضور الأموات الاحياء عشان بالاخير يطلع اهو و يخرعك

Dead End

من اسم البيت .... يبين الوضع ... تدخل داخل هالبيت المسكون و تمشي بين الاشباح و تمر على المكتبة فجأة تلاقي كتاب يطير فوق راسك ، و واحد يهمس بخرابيط بأذونك .. هالبيت يعتمد على الخدع البصرية اكثر من وجود الممثلين اللي يخرعون

Penn and Teller 

بين و تيلير هما في الحقيقة لاعبي خفة على قولتهم يشتغلون بالمجال من ١٩٧٠ كان لهم برنامج تلفزيون بس الحين يشتغلون بعروض بلاس فيغاس .. من هني استوحوا بيت الرعب هذا اللي يقولونلك فيه ان احد خدع بين و تيلير فشلت و نتج عنها انفجار نووي دمر الملهى كله و لاس فيغاس .. فلازم تحط بالك من الناس المشوهين بالملهى

House of Horror

بيت الرعب الكلاسيكي ... البيت هذا كله ظلمة و ما يشب فيه ليت الا مع البرق .. و حزة ما يشب البرق ما تدري منو ممكن يطلع بويهك.. دراكولا .. الرجل الذئب على قولتهم و الا حتى فرانكشتاين .. عادي توقع الغير متوقع بهالبيت 

اخر بيت كان هو نجم الحفلة 

Silent Hill

مقتبس من الفلم الذي يحمل نفس الاسم .. البيت هذا عبارة عن اعادة تجسيد للفلم بحذافيره ... كل شي كان هناك السيارة .. ، الشرطية النار، حتى الشخصيات كلها .. كأنك داخل الفلم صج

بجذي اكون خلصت البيوت كلها .. الحين بحطلكم جم صورة قدرت اصورهم هناك

في النهاية اتمنى اني اكون وصلت الوضع عدل .. اهي تجربة يديدة علي ووايد حلوة انصح فيها .. للأمانة الأدبية الصور مو كلها من عندي في شغلات نزلتها من مواقع ثانية